Confira a versão do Manifesto da Plataforma sobre o processo eleitoral de 2020 em língua Munduruku, feita pelo Professor Honesio Munduruku:
Plataforma dos Movimentos Sociais pela Reforma do Sistema Político bit teku adedem ip ojeweag͂u͂y ixik iayu͂, ite be kake 100 bodin ma organizaçãoyu͂ e soat ip democracia mu͂bacan ojuy’ayu͂ i iteyu͂ política esistema mu͂warurun ojuy ip Brasil be soat edireito mu͂bacanap ojuy, pu͂g͂pu͂g͂ ã kariwa’ayu͂ ata͂ ijoyu͂ kabia cedireitote i buye.
Ijop esemana Plataforma dos Movimentos Sociais pela Reforma do Sistema Político iat og͂u͂bapuk adede be jemanifesto, jag͂u͂y, ajo imu͂g͂e͂ pin eleição 2020 etempo bima iap.
Ijop Manifesto a’o͂ yopi͂t
Brasil o’e iba’ore ji͂ja͂’at pe. Kapkam o’e, pu͂g͂ etempo be na, pandemia kuy 140 mil bodin ma wuyjuyu͂yu͂ o’yaoka i 4 milhões podin ma wuyjuyu͂yu͂ o’g͂u͂we͂taxipin, ade ji͂ja͂ o’e cepikap’u͂mayu͂, bodin ma o’e tadaybotayu͂ ade i cedig͂ero’u͂mayu͂ dak, teibog͂ ci͂ca͂ o’e tarekrek i ade ji͂ja͂ o’e daxa dak awaydip mu͂pikupig͂ Amazonia eypi dag͂ i Pantanal be dak. G͂asu͂ iecug͂’am omuy iat ewag͂u͂yap, soat mu͂’u͂map ata͂ yag͂u͂y be, ixe adede kay g͂u jewejojo i, itaybit pin g͂u pu͂g͂ tag͂ ma ajop iap kay i adede a’o͂ kay g͂u ajo iat mu͂g͂e͂m pima.
Jair Bolsonaro i ade governadoyu͂ ip eleitom o’e 2018 ekoato bima jewag͂u͂yg͂u͂y politica mu͂’u͂map kay, ime͂n ip yag͂u͂y osodop, xipat g͂u beku politica i ip yag͂u͂y. Ibo acoi ojebapuk politica esistema adede a’o͂ kug͂ yopi͂t a͂ buye, ya’o͂ baca’u͂mat puxim i ade g͂u dak representante kake osodop, i soat g͂u Brasil watwat osodop representanteyu͂ kug͂: bitku pu͂g͂pu͂g͂ i ma wuyjuyu͂mayu͂ cerepresentante kake ip ibe politica ibaca’at tag͂ i topayo͂n’ayu͂ erepresentante dak ime͂n ma.
Eleição 2020 bima ap pe am, Plataforma dos Movimentos Sociais pela Reforma do Sistema Politico iat, jewag͂u͂yg͂u͂y dig͂ero mu͂po͂g͂po͂g͂ ap kay Fundo Partidário iat pe at, imu͂we’ut ojoy ayacayu͂ be am, topayo͂n’ayu͂ be am i wuyjuyu͂ be am tak, i soat pe am jewejojo i cekay imu͂po͂g͂po͂g͂ am, i dak soat candidatomayu͂ kay jewejojo ieebutap kug͂ soat tag͂ jewemu͂bapukam i jekuku am i.
Ibo epolitica mu͂warurunam wara’acayu͂ ekoato be am, Plataforma me͂nku cekay, candidatomayu͂ juy soat ip jewag͂u͂y me͂nku i:
- Eleição esistema mu͂warurun: pu͂g͂’at pe g͂u wuyju candidatomat pe votam, adedem ip candidatomayu͂ jewag͂u͂ycomayu͂ pu͂g͂ epartido be na iayu͂ be ata͂ votam, ayacayu͂ be dak vota butam, topayo͂n’ayu͂ be, wuyjuyu͂yu͂ be, LGBTyu͂ be i wara’acat pe dak ibe ade’u͂man representante kug͂ iayu͂ be.
- Soat em kuka ip oekuku ibe politica dag͂ jewemu͂bapukpug͂: ibe politica mu͂g͂e͂g͂e͂ ap mu͂bacacanam, ibo soat politicamat mu͂ju am xipan i ibe “recurso publico” mu͂ju am tak xipan ape͂nam cuk ixe ojeweum iap tag͂ – ape͂n cuk ibe conselhoyu͂ i conferenciayu͂ iat puxim.
- Ajo ibo adede a’o͂ mu͂bacanam e’em Constituição Federal be iat mu͂bacanam (plesbicito, referendo e iniciativa popular iat) – iba’ore’at takatam ibe lei mu͂bapug͂ pima am adede a’o͂ be jewemu͂g͂e͂g͂e͂m iat pe am.
- Jeku͂yjojom wuyju ibe soat “politica pública” be am jewemu͂g͂e͂g͂e͂m iat, ibe dig͂ero bem am e’em iat i adede be am e’em iat tak, ibo tog͂wi boku ie but soat mu͂po͂g͂po͂g͂ am, dig͂ero mu͂po͂g͂po͂g͂ am jewejojo i ibo bewi dak awaydip tak tiptaxijo but.
Iju Plataforma edocumento jewemu͂bapuk candidatoyu͂ be, partidoyu͂ be i eleitoyu͂ be dak, bodi ku ibo politica esistema mu͂warurunam ekawe͂n mu͂ju am.
